Një grup shkencëtarësh të njohur ndërkombëtarisht kanë ngritur alarmin ndaj FIFA-s, duke paralajmëruar se masat aktuale të mbrojtjes nga temperaturat e larta për Kupën e Botës 2026 janë të pamjaftueshme dhe mund të rrezikojnë seriozisht shëndetin e futbollistëve.
Në një letër të hapur, ekspertë të fushës së shëndetësisë, klimës dhe performancës sportive theksojnë se udhëzimet aktuale të FIFA-s nuk përputhen me të dhënat më të fundit shkencore dhe janë “të pajustifikueshme”. Ata kërkojnë ndërhyrje urgjente, përfshirë pushime më të gjata për freskim dhe mundësinë e shtyrjes së ndeshjeve kur temperaturat arrijnë nivele ekstreme.
Shqetësimet lidhen me Kupën e Botës 2026, e cila do të zhvillohet në SHBA, Kanada dhe Meksikë, ku sipas studiuesve 14 nga 16 stadiumet mund të përballen me temperatura të rrezikshme gjatë verës.
Në zonat jugore të SHBA-së dhe veriut të Meksikës, temperaturat ditore shpesh arrijnë mbi 30°C dhe në periudhat më të nxehta mund të afrohen deri në 40°C. Kur këtyre u shtohen lagështia, era dhe ekspozimi ndaj diellit, rreziku për stres ekstrem termik tek lojtarët rritet ndjeshëm.
Nga ana tjetër, FIFA deklaron se mbetet “e përkushtuar për mbrojtjen e shëndetit dhe sigurisë së lojtarëve, gjyqtarëve, tifozëve dhe stafit”, duke shtuar se kushtet klimatike janë pjesë e planifikimit të turneut.
Aktualisht, FIFA ka vendosur pushime të detyrueshme tre-minutëshe për freskim në secilën pjesë të ndeshjeve, si dhe stola me klimë të kontrolluar për stafet teknike dhe lojtarët rezervë në stadiumet e hapura.
Organizata përdor gjithashtu indeksin WBGT (Temperatura e Globit të Lëngshëm), një standard që mat ndikimin e nxehtësisë dhe lagështisë në organizëm. Një nivel prej 28°C konsiderohet tashmë shqetësues për atletët elitarë, ndërsa mbi 32°C kërkohen masa shtesë parandaluese.
Për tifozët, FIFA ka njoftuar se do të lejohen shishe uji të mbyllura dhe do të shtohen zonat me hije, sistemet freskuese me avuj, autobusët me ajër të kondicionuar dhe pikat e shpërndarjes së ujit.
Megjithatë, 20 ekspertët që firmosën letrën kërkojnë masa shumë më të forta. Ata propozojnë:
shtyrjen e ndeshjeve kur WBGT kalon 28°C;
pushime freskuese prej të paktën gjashtë minutash;
pajisje më të avancuara ftohëse për lojtarët;
përditësim të vazhdueshëm të protokolleve sipas zbulimeve më të fundit shkencore.
Ekspertët gjithashtu i bëjnë thirrje FIFA-s të adoptojë standardet e rekomanduara nga sindikata globale e futbollistëve, Fifpro.
