Gjykatat shqiptare e kanë dënuar me 25 vite burg, ndërsa autoritetet belge e kërkojnë për vrasjen e Brunilda Dervishit. Pas krimit të dyfishtë në Shqipëri, Hoxhaj u arratis fillimisht në Greqi dhe më pas në Belgjikë.
Sipas hetimeve të agjencive ligjzbatuese europiane, aktiviteti i tij në Belgjikë lidhej me prostitucionin. Dyshohet se ai kishte lidhur një martesë fiktive me Brunilda Dervishin dhe më pas e shfrytëzonte për prostitucion, derisa e vrau në një lokal në Bruksel pas konflikteve mes tyre.
Pas kësaj ngjarjeje, ai u transferua në Britaninë e Madhe me dokumente të falsifikuara kosovare, duke siguruar leje qëndrimi. Më vonë, për t’iu shmangur identifikimit, u zhvendos në SHBA në fillim të viteve 2000, ku jetoi për vite me një identitet tjetër.
Pas një hetimi të gjatë ndërkombëtar, autoritetet shqiptare, amerikane, belge dhe britanike arritën të identifikonin vendndodhjen e tij. Në vitin 2021 hetimet u intensifikuan, ndërsa përmes shenjave të gishtave dhe fotografive të vjetra u konfirmua identiteti i tij i vërtetë.
Më 5 maj, Sokol Hoxhaj u arrestua në Ohajo pas afro 30 vitesh në arrati. Tashmë autoritetet amerikane po shqyrtojnë ekstradimin e tij drejt Shqipërisë ose Belgjikës, ku pritet të përballet me drejtësinë për krimet e së kaluarës.
