Ndërsa kryeministri Rama vijon të promovojë Shqipërinë si një model të ri të transparencës që lë pas edhe standardet e vendeve nordike, realiteti i procedurave të prokurimit publik duket se ka mbetur në epokën e "qepjes me porosi".
Rasti më i fundit vjen nga Operatori i Blerjeve të Përqendruara (OBP) i drejtuar nga Arlinda Pogaj, i cili ka hapur një tender me vlerë 359 milionë lekë ose rreth 3.7 milionë euro, për pajisjen e Policisë së Shtetit me automjete të reja SUV.
Në pamje të parë, kriteret teknike për 20 mjetet e tipit 4×4 duken si parametra standardë. Por, sapo futesh në detaje, kupton se "rrethi" i konkurrencës është aq i ngushtë, saqë ngjan më shumë me një rrugicë pa krye.
Sipas dokumenteve të tenderit, automjeti duhet të ketë:
Në një provë të thjeshtë me modelet më prestigjioze të tregut global (BMW X7, Mercedes GLS apo Ineos Grenadier), rezulton se asnjë prej tyre nuk i plotëson të gjitha kriteret njëkohësisht. Ose janë shumë të gjatë për kufirin maksimal, ose kanë distancë aksiale më të shkurtër se sa kërkohet.
I vetmi model që kalon "në vrimë të gjilpërës" është Land Rover Defender 110. Ky automjet jo vetëm që përmbush kërkesat teknike deri në milimetrin e fundit, por rastis të jetë një markë që në Shqipëri përfaqësohet ekskluzivisht nga bizneset e lidhura me familjarët e kryebashkiakes së Durrësit, Emirjana Sako.
Pyetja që lind natyrshëm është: Pse Policisë së Shtetit i duhet një mjet që ka detyrimisht distancën mes akseve mbi 3 metra, por nuk duhet të jetë më i gjatë se 5.05 metra? Ky kombinim specifikash "djeg" automatikisht çdo konkurrent tjetër në treg, duke e kthyer tenderin nga një garë ofertash, në një njoftim shitjeje të paracaktuar.
Nëse ky është standardi i ri i "ndershmërisë" që kalon Gjermaninë dhe Suedinë, atëherë prokuroria nuk ka nevojë për shumë inteligjencë, as njerëzore dhe as artificiale, për të kuptuar se ku po shkojnë paratë e taksapaguesve.
Ky nuk është thjesht një tender; është një provë flagrante se si specifikimet teknike përdoren si mjet për të paracaktuar fituesin, duke lënë pas vetëm pluhurin e një gare fiktive.
