Elseid Hysaj duket se po përgatitet t’i japë fund aventurës së tij me S.S. Lazio. Kontrata e mbrojtësit të kombëtares shqiptare përfundon në qershor të këtij viti dhe shkodrani ka menduar një mënyrë të veçantë për të përshëndetur skuadrën para largimit.
Sipas raportimeve të Radio Laziale, në qendrën stërvitore të Formellos pritet të organizohet në ditët në vijim një drekë me zgarë me pjesëmarrjen e të gjithë ekipit. Qëllimi i këtij takimi është ruajtja e atmosferës pozitive pas rezultateve të fundit, si edhe forcimi i grupit për sfidat e mbetura në kampionat dhe finalen e Coppa Italia Final.
Sërish sipas medias italiane, ideatori i këtij organizimi është vetë Hysaj. Me kontratën që i përfundon muajin e ardhshëm, mbrojtësi shqiptar do të jetë lojtar i lirë nga 1 korriku dhe kjo drekë shihet edhe si një mundësi për të përshëndetur shokët e skuadrës para ndarjes me ekipin bardhekaltër.
