Argjentina është vënë në fokus të autoriteteve ndërkombëtare shëndetësore pas shpërthimit të Hantavirusit në anijen turistike holandeze MV Hondius. Hetimet janë përqendruar në një zonë të kontaminuar pranë Ushuaias, në jug të vendit, e cila dyshohet se mund të ketë qenë burimi fillestar i infeksionit.
Sipas të dhënave paraprake, një çift nga Holanda besohet se është infektuar gjatë një ekskursioni për vëzhgimin e shpendëve në këtë rajon, duke u bërë kështu hallka e parë e zinxhirit të transmetimit në bord.
Kjo zonë vizitohet shpesh nga turistë për shkak të biodiversitetit të pasur të shpendëve, por kushtet natyrore aty favorizojnë edhe praninë e brejtësve që mbartin virusin. Hantavirusi përhapet përmes kontaktit me urinën, pështymën ose jashtëqitjet e brejtësve të infektuar.
Ekspertët e konsiderojnë veçanërisht alarmues faktin se në këtë rast është identifikuar varianti “Andes”, i vetmi lloj i njohur i Hantavirusit që mund të transmetohet nga njeriu tek njeriu. Dyshohet se pikërisht kjo veçori ndikoi në përhapjen e rasteve mes pasagjerëve pasi çifti u ngjit në anije.
Ngjarja ka rikthyer në vëmendje edhe vendimin e Argjentinës për t’u tërhequr nga Organizata Botërore e Shëndetësisë. Largimi nga OBSH-ja, i cili hyri në fuqi në mesin e marsit, paralelisht me vendimin e ngjashëm të SHBA-së, shkaktoi reagime në arenën ndërkombëtare.
Drejtori i përgjithshëm i OBSH-së, Tedros Adhanom Ghebreyesus, u bëri thirrje të dy vendeve të rishikonin këtë hap, ndërsa qeveria argjentinase deklaroi se bashkëpunimi ndërkombëtar në fushën e shëndetësisë mund të vazhdojë edhe jashtë organizatës.
Pavarësisht kësaj, Argjentina vijon të bashkëpunojë teknikisht me Organizatën Pan-Amerikane të Shëndetësisë.
Varianti “Andes” lidhet me një specie brejtësi të quajtur Oligoryzomys longicaudatus, i njohur si “miu me bisht të gjatë” ose “colilargo”, që jeton në jug të Argjentinës dhe Kilit. Ky brejtës konsiderohet rezervuari natyror i virusit.
Edhe pse kafshët e infektuara zakonisht nuk shfaqin simptoma, ato mund ta transmetojnë virusin te brejtës të tjerë, veçanërisht gjatë sezonit të çiftëzimit. Studiuesit theksojnë se numri i tyre ndikohet nga faktorë si klima, furnizimi me ushqim dhe aktiviteti njerëzor, përfshirë shpyllëzimin dhe zgjerimin e zonave bujqësore.
