Sipas një analize të publikuar nga Corriere della Sera, lufta në Iran po krijon fitues dhe humbës të rinj në ekonominë globale. Një studim i qendrës kërkimore bahreinite Derasat tregon se Rusia renditet mes përfituesve më të mëdhenj, me rreth 5.2 miliardë dollarë të ardhura shtesë falë rritjes së eksporteve energjetike dhe lehtësimit të sanksioneve. Po ashtu, Shtetet e Bashkuara kanë përfituar nga rritja e kërkesës për gaz shale, ndërsa Norvegjia, Kanadaja dhe Indonezia kanë parë rritje të fitimeve nga energjia dhe qymyri.
Në anën tjetër, ekonomitë aziatike po përballen me kosto të larta nga ndërprerjet e furnizimeve në Gjirin Persik. Kina rezulton humbësja më e madhe, me një faturë shtesë prej 16.8 miliardë dollarësh për importet e energjisë dhe çelikut, ndërsa Japonia, India dhe Koreja e Jugut po përballen gjithashtu me rritje të forta të kostove. Edhe Eurozona ka shpenzuar miliarda dollarë më shumë për të kompensuar mungesën e gazit nga Katari. Ndërkohë, Arabia Saudite dhe Emiratet e Bashkuara Arabe po kërkojnë rrugë alternative eksporti për të shmangur varësinë nga Ngushtica e Hormuzit.
Konflikti ka sjellë fitime të mëdha edhe për kompanitë ndërkombëtare të energjisë, bankat dhe industrinë ushtarake. Gjigantë si BP, Shell dhe TotalEnergies kanë raportuar rritje të ndjeshme të fitimeve, ndërsa bankat amerikane kanë përfituar nga luhatjet në tregjet financiare. Në sektorin e mbrojtjes, kompani si Lockheed Martin, Boeing dhe Leonardo kanë regjistruar porosi rekord për sisteme mbrojtjeje dhe armatime, ndërsa kërkesa globale për teknologji ushtarake vijon të rritet.
