Një konflikt i rëndë i ndodhur në një lokal pranë karburantit në Sarandë ka përfunduar me vrasjen e 66-vjeçarit Rexhep Ismaili. Sipas të dhënave paraprake, viktima nuk ishte i përfshirë drejtpërdrejt në sherrin fillestar, ndërsa në ambientet e lokalit kanë hyrë të paktën 10 persona që kërkonin të rrëmbenin një person me të cilin kishin konflikt, i dyshuar për çështje pronësie.
Burime nga hetimi bëjnë me dije se situata është tensionuar pasi Rexhep Ismaili ka ndërhyrë për të mbrojtur personin që ndodhej në lokal, duke u thënë autorëve: “Djali është në shtëpinë tonë dhe nuk e prekni dot këtu”. Pas kësaj, konflikti ka degraduar në përdorim arme, duke i marrë jetën 66-vjeçarit.
Në vendngjarje autorët kanë lënë edhe një automjet, i cili pritet të ndihmojë grupin hetimor në identifikimin e tyre. Ndërkohë, reagim për ngjarjen ka bërë edhe Shoqata Çamëria, e cila e cilësoi Rexhep Ismailin si një zë të palëkundur të çështjes çame.
