Pamje që kanë shkaktuar reagime të shumta në rrjetet sociale janë publikuar nga lagjja Dobraç në Shkodër, ku shihet një këlysh ariu i mbyllur brenda një oborri të rrethuar me mur tullash.
Në videon që po qarkullon gjerësisht online, ariu i vogël duket teksa përpiqet të kacavirret në një portë me rrjetë, e vendosur për të ndarë dy ambiente të ndryshme brenda oborrit. Sjellja e kafshës ka ngjallur shqetësim dhe reagime të forta nga qytetarët, të cilët kanë shpërndarë pamjet në masë.
Deri më tani nuk dihet se si ka përfunduar këlyshi i ariut në pronësi private dhe as nëse autoritetet janë vënë në dijeni për rastin. Po ashtu, mbetet e paqartë nëse kafsha është marrë nga habitat natyror apo është mbajtur në mënyrë të paligjshme.
Pamjet kanë rikthyer diskutimet mbi mbrojtjen e kafshëve të egra dhe rastet e mbajtjes së tyre në ambiente të papërshtatshme, ndërsa qytetarët kërkojnë ndërhyrjen e institucioneve për verifikimin e situatës.
