Një ngjarje e rëndë ka tronditur Akademinë e Sigurisë në Sauk, ku 56 studentë, të cilët po trajnohen për t'u bërë oficerë të policisë së nesërme, përfunduan me simptoma të rënda helmimi.
Pas këtij incidenti masiv, Autoriteti Kombëtar i Ushqimit (AKU), nën drejtimin e Blerina Gjylametit, ka ndërhyrë duke bllokuar një sasi ushqimesh të pasigurta.
Gjatë kontrollit, inspektorët bllokuan 155 kilogramë produkte të ndryshme si makarona, sallam, djathë dhe kos, si dhe 1350 kokrra vezë, të cilat u dërguan për analiza mikrobiologjike.
Hetimi zbuloi se ushqimi prodhohej në ambientet e garnizonit “Skënderbej” nga kompania private "Sori-Al", e lidhur me biznesmenin Nikolin Jaka, dhe transportohej si catering drejt Akademisë.
Për këtë dështim në sistemin e gjurmueshmërisë dhe sigurisë, AKU vendosi një gjobë prej 100 mijë lekësh për kompaninë e Nikolin Jakës.
Vendimi për të gjobitur me vetëm 100 mijë lekë (rreth 1,000 euro) një kompani që ka helmuar 56 persona është, në rastin më të mirë, një fyerje për të dëmtuarit dhe, në rastin më të keq, një inkurajim i hapur për papërgjegjshmërinë.
Kjo vlerë, e cila në pamje të parë duket si masë administrative, shpërfaq një disproporcion të frikshëm mes dëmit të shkaktuar dhe ndëshkimit të dhënë.
Së pari, nëse e llogarisim vlerën e gjobës për person, rezulton se "çmimi" i helmimit të një studenti të policisë është diku te 1,700 lekë të vjetra.
Kjo shifër është qesharake dhe nuk mbulon as koston minimale të një serumi apo të shërbimit mjekësor që këta të rinj morën në spital. Është e papranueshme që një incident që vë në rrezik jetën e dhjetëra njerëzve të trajtohet me të njëjtën peshë financiare si një shkelje e vogël procedurale.
Së dyti, për kompani që fitojnë kontrata miliona euroshe për furnizimin e institucioneve shtetërore, një gjobë prej 1,000 eurosh nuk përbën asnjë lloj presioni financiar.
Përkundrazi, kjo kosto llogaritet si një "shpenzim i papërfillshëm pune". Kur ndëshkimi nuk dhemb, ai pushon së qeni ndëshkim dhe kthehet në një lloj "takse" që paguhet për të vazhduar punën me të njëjtat standarde të dobëta.
Së fundmi, ky rast dëshmon se si standardet e sigurisë ushqimore në Shqipëri shpesh mbeten në letër.
Në një vend ku ligji do të zbatohej me rreptësi, një helmim i këtyre përmasave në një institucion sigurie kombëtare duhet të pasonte me pezullimin e menjëhershëm të licencës së subjektit dhe nisjen e një hetimi penal. Mjaftimi me një gjobë simbolike vetëm sa përforcon bindjen se shëndeti i qytetarëve peshon shumë më pak se interesat e bizneseve që ushqehen me paratë e buxhetit të shtetit.
