Rritja e konsumit të pijeve të ëmbla me sheqer po shihet gjithnjë e më shumë si një nga arsyet kryesore të shtimit të rasteve të mbipeshës dhe obezitetit në të gjithë botën.
Ekspertët e shëndetit publik paralajmërojnë se kjo problematikë nuk prek më vetëm vendet e zhvilluara, por po përhapet me ritme të shpejta edhe në shtetet me të ardhura të ulëta dhe të mesme, sidomos në zonat urbane.
Mbipesha dhe obeziteti konsiderohen faktorë të rëndësishëm rreziku për shumë sëmundje jo të transmetueshme, si diabeti, problemet kardiovaskulare dhe disa forma të kancerit. Ndërsa dikur këto shqetësime lidhnin kryesisht vendet e pasura, sot ato po marrin përmasa alarmante edhe në shoqëritë në zhvillim.
Një nga faktorët që po ndikon në këtë situatë është konsumi i lartë i pijeve të ëmbëlsuara me sheqer. Këto produkte përmbajnë sasi të konsiderueshme sheqernash, si saharoza dhe fruktoza, të cilat rrisin ndjeshëm nivelin kalorik të dietës, por pa ofruar vlera të rëndësishme ushqyese.
Sipas specialistëve, kaloritë që vijnë nga këto pije nuk krijojnë të njëjtën ndjesi ngopjeje si ushqimet e ngurta, duke bërë që individët të konsumojnë më shumë energji gjatë ditës. Kjo çon shpesh në shtim të pashëndetshëm të peshës trupore.
Organizata Botërore e Shëndetësisë ka hartuar udhëzime të posaçme për reduktimin e konsumit të sheqernave të lira, duke u bazuar në ndikimin që ato kanë në shtimin në peshë dhe dëmtimin e shëndetit dentar.
Studimet aktuale tregojnë se ekziston një lidhje e drejtpërdrejtë mes konsumit të lartë të pijeve me sheqer dhe shtimit në peshë. Për këtë arsye, ulja e përdorimit të tyre konsiderohet një hap i rëndësishëm për parandalimin e obezitetit si tek të rriturit, ashtu edhe tek fëmijët.
Sheqernat e lira përfshijnë të gjitha sheqernat e shtuara në ushqime dhe pije nga prodhuesit, kuzhinierët apo vetë konsumatorët, si dhe ato që gjenden natyrshëm në mjaltë, shurupe, lëngje frutash dhe koncentrate frutash.
OBSH rekomandon që konsumi i sheqernave të lira të mbahet nën 10% të marrjes totale ditore të energjisë, ndërsa sugjeron që përfitime edhe më të mëdha për shëndetin arrihen kur ky nivel ulet nën 5%.
