Një aksion i befasishëm është zhvilluar në burgun e Fushë-Krujës nga Drejtoria e Përgjithshme e Burgjeve, në kuadër të kontrolleve për forcimin e sigurisë dhe disiplinës në institucionet e vuajtjes së dënimit.
Kontrolli ka nisur të mërkurën rreth orës 17:30 dhe ka përfunduar në orën 19:30. Gjatë operacionit, autoritetet kanë ushtruar kontrolle të imtësishme në ambientet e burgut, ku janë konstatuar dhe sekuestruar disa sende të ndaluara.
Sipas njoftimit zyrtar, janë gjetur 3 telefona celularë, 3 ora të modifikuara me funksion telefoni, mjete të improvizuara të mprehta, si edhe sende të tjera të palejuara brenda institucionit.
Në reagimin zyrtar, Drejtoria e Përgjithshme e Burgjeve thekson se kontrollet do të vijojnë me intensitet të lartë në të gjitha burgjet e vendit dhe se nuk do të ketë tolerancë ndaj shkeljeve të rregullave.
“Çdo tentativë për të cenuar sigurinë, rendin dhe rregullin në institucionet e vuajtjes së dënimit do të goditet menjëherë dhe pa kompromis. Askush nuk është mbi rregullat. Përgjegjësia do të jetë individuale dhe institucionale. Toleranca është zero”, thuhet në njoftim.
