Paris Saint-Germain ka prerë biletën për në finalen e UEFA Champions League, pasi eliminoi Bayern Munich në një përballje dramatike me dy ndeshje. Barazimi 1-1 në “Allianz Arena” i mjaftoi francezëve për të kaluar më tej, falë fitores spektakolare 5-4 në ndeshjen e parë në Paris, duke vulosur gjithçka me rezultatin e përgjithshëm 6-5.
Takimi në Mynih nisi menjëherë me ritëm të lartë dhe ishte PSG që goditi e para. Që në minutat e para, një kundërsulm i shpejtë i finalizuar nga Ousmane Dembélé, pas asistit të Khvicha Kvaratskhelia, i dha avantazhin kampionëve në fuqi.
Bayern Munich reagoi dhe krijoi disa raste të mira në pjesën e parë, por pa konkretizim. Goditjet e rrezikshme të Luis Díaz dhe Michael Olise nuk gjetën rrugën e rrjetës, ndërsa portieri i PSG-së u tregua vendimtar në disa momente kyçe.
Pjesa e dytë vijoi me dominimin e bavarezëve, të cilët kërkuan me insistim golin e barazimit. Edhe pse krijuan disa mundësi të mira, përballë tyre ishte një PSG e organizuar dhe një portier në formë të shkëlqyer.
Vetëm në minutat shtesë, përpjekjet e vendasve u shpërblyen, kur Harry Kane shënoi golin e barazimit pas një asistimi nga Alphonso Davies. Megjithatë, ishte tepër vonë për të ndryshuar fatin e kualifikimit.
Me këtë rezultat, PSG siguron finalen e dytë radhazi në Champions League, duke konfirmuar statusin si një nga skuadrat më të forta të momentit në Europë.
Në finalen e madhe që do të zhvillohet në Budapest më 30 maj, parizienët do të përballen me Arsenal. Për londinezët është një mundësi historike për trofeun e parë, ndërsa PSG synon të mbrojë titullin dhe të shkruajë sërish histori.
