Janë publikuar pamje nga fundosja e një anijeje mallrash në orët e para të mëngjesit në ujërat greke, në veri të ishullit Andros. Anija, e cila ishte nisur nga Shqipëria me destinacion Ukrainën dhe transportonte rreth 8 mijë tonë sodë, është përplasur me shkëmbinj në një zonë të rrezikshme bregdetare, duke pësuar dëmtime të rënda që çuan në mbytjen e saj.
Në bord ndodheshin 9 anëtarë ekuipazhi, 8 shtetas turq dhe 1 nga Azerbajxhani, të cilët u shpëtuan të gjithë në një operacion të koordinuar nga Roja Bregdetare Greke. Dy prej tyre u nxorën direkt nga deti nga një mjet patrullimi, ndërsa shtatë të tjerët u evakuuan nga një zonë shkëmbore e paarritshme në ishull, me ndihmën e mjeteve detare dhe ajrore.
Në operacionin e shpëtimit morën pjesë disa anije, përfshirë mjete patrullimi dhe një anije pasagjerësh, si dhe një helikopter i Forcave Ajrore. Autoritetet greke kanë nisur hetimet për të përcaktuar shkaqet e aksidentit detar, ndërsa pamjet nga vendngjarja tregojnë momentet e fundosjes së anijes që ishte nisur nga Shqipëria drejt Ukrainës.
