Skandali i raportuar në një nga institucionet më të mëdha financiare në botë ka marrë vëmendje të gjerë pas akuzave të ngritura ndaj drejtueses ekzekutive shqiptare Lorna Hajdini. Sipas padisë së dorëzuar më 28 prill 2025 në Gjykatën Supreme të Nju Jorkut, ish-punonjësi Chirayu Rana, 35 vjeç, pretendon se është droguar dhe detyruar në marrëdhënie seksuale kundër vullnetit të tij. Ai ka zgjedhur të paraqitet në dokumente me pseudonimin “John Doe”, duke argumentuar se është kërcënuar në lidhje me karrierën e tij profesionale nëse do të fliste publikisht.
Megjithatë, zhvillime të reja nga burime mediatike amerikane hedhin hije dyshimi mbi besueshmërinë e pretendimeve të Rana. Raportohet se ai kishte mashtruar kompaninë për një çështje personale, duke deklaruar rrejshëm se babai i tij ishte në gjendje të rëndë shëndetësore për të përfituar rreth tre muaj leje të paguar. Gjatë periudhës nga dhjetori 2024 deri në maj 2025, ai kishte marrë disa leje dhe kishte siguruar edhe mundësinë për të punuar nga distanca, kohë që dyshohet se e ka përdorur për përgatitjen e padisë ligjore.
Nga ana tjetër, Lorna Hajdini, 37 vjeç, i ka mohuar kategorikisht të gjitha akuzat përmes ekipit të saj ligjor. Avokatët e saj deklarojnë se ajo nuk ka qenë kurrë e përfshirë në sjellje të papërshtatshme dhe as nuk ka qenë e pranishme në vendin ku pretendohet të ketë ndodhur ngjarja. Ndërkohë, hetimet pritet të vijojnë, ndërsa opinioni publik dhe mediat ndjekin nga afër zhvillimet në këtë çështje të ndjeshme që ka tronditur jo vetëm sektorin financiar, por edhe debatin mbi etikën dhe abuzimin në vendin e punës.
