Detaje të reja kanë dalë nga aksidenti tragjik i ndodhur këtë të diel në lagjen nr. 15 në Durrës, ku humbën jetën dy fëmijë dhe një tjetër mbeti i plagosur rëndë.
I mituri i plagosur është transportuar me urgjencë drejt Spitalit të Traumës në Tiranë, ku sipas një reagimi zyrtar nga Ministria e Shëndetësisë ndodhet në gjendje të rëndë, por koshient. Bëhet me dije se ai ka pësuar dëmtime të shumta si pasojë e përplasjes së fortë.
Ngjarja e rëndë ndodhi rreth orës 14:20 në zonën e ish-Kënetës, ku tre fëmijë që po luanin pranë banesave të tyre u përplasën nga një automjet tip “Benz ML”, i drejtuar nga 57-vjeçari Nikoll Radaçi.
Si pasojë e goditjes së fortë, njëri prej të miturve humbi jetën në vendngjarje, ndërsa tjetri ndërroi jetë më vonë në spital. Fëmija i tretë po lufton për jetën nën kujdesin e mjekëve.
Sipas informacioneve paraprake, dyshohet se drejtuesi i mjetit ka humbur kontrollin dhe nuk përjashtohet mundësia që të ketë qenë në gjendje të dehur në momentin e aksidentit. Banorë të zonës e përshkruajnë atë si person problematik, që shpesh kryente manovra të rrezikshme.
Ndërkohë, policia vijon hetimet për të zbardhur plotësisht rrethanat e kësaj tragjedie që ka tronditur opinionin publik.
