Administrata e Donald Trump po ndërmerr hapa për të përshpejtuar shitjet e armëve me vlerë mbi 8 miliardë dollarë për Izraelin, Katarin, Emiratet e Bashkuara Arabe dhe Kuvajtin, sipas një deklarate nga Departamenti i Shtetit. Sipas CNN, paketa përfshin sisteme të mbrojtjes ajrore dhe raketa të drejtuara me lazer, ndërsa për Katarin përfshihen edhe raketat Patriot, një komponent kyç i mbrojtjes ajrore amerikane.
Ky zhvillim vjen në një moment kur një raport i Center for Strategic and International Studies paralajmëroi se rezervat e raketave Patriot të SHBA-së janë zvogëluar ndjeshëm pas tensioneve dhe përplasjeve me Iranin. Për të përshpejtuar marrëveshjet, Sekretari i Shtetit Marco Rubio ka shpallur gjendje emergjente, duke anashkaluar procesin normal të shqyrtimit nga Kongresi.
Kjo nuk është hera e parë që përdoret ky mekanizëm: më herët gjatë vitit, administrata kishte shpallur emergjencë për të miratuar shitjen e 12,000 bombave për Izraelin dhe për të përshpejtuar furnizimet ushtarake për vendet e Gjirit dhe Jordaninë. Ky veprim ka ngritur shqetësime për mungesën e mbikëqyrjes parlamentare në vendime të rëndësishme të politikës së jashtme dhe sigurisë.
