Harroni grabitjet klasike me maska dhe zhurmë! Një pastiçeri në Meksikë është bërë skenë e një “vjedhjeje” krejtësisht të pazakontë, ku protagonisti nuk kërkonte para, por ëmbëlsira.
Në videon që po qarkullon me shpejtësi në rrjet, një majmun shfaqet duke u ngjitur mbi banak me një siguri që do ta kishin zili edhe hajdutët profesionistë. Pa humbur kohë, ai drejtohet menjëherë te vitrina e ëmbëlsirave.
Me një lëvizje të shpejtë dhe të saktë, “zgjedh” dy donutë të mëdhenj (petulla) dhe i rrëmben pa hezitim, përpara syve të klientëve dhe stafit.
Të pranishmit, në vend që të trembeshin, nxorën telefonat dhe nisën të filmonin skenën, e cila u kthye menjëherë në moment viral.
Pas “operacionit”, majmuni largohet qetësisht, duke lënë pas buzëqeshje dhe habi. Lëvizjet e tij kanë bërë që shumë përdorues të dyshojnë se kjo nuk ishte hera e parë.
Në një vend të njohur për biodiversitetin si Meksika, kjo ngjarje tregoi se edhe kafshët kanë “dobësi” për ëmbëlsirat… dhe ndonjëherë edhe talent për t’i marrë vetë!
