Policia e Sarandës ka shpallur në kërkim 37-vjeçarin Edmond Abazi, i njohur ndryshe si “Monçja”, pas një ngjarjeje të ndodhur dy ditë më parë në zonën e quajtur “Plazhi i Ri”, ku mbeti i plagosur me thikë një i ri.
Sipas informacioneve paraprake, Abazi dyshohet se ka goditur me mjet prerës 26-vjeçarin Enkel Dano gjatë një konflikti mes tyre. Si pasojë, ky i fundit ka marrë plagë në pjesën e pasme të trupit, por pas ndihmës mjekësore ndodhet jashtë rrezikut për jetën.
37-vjeçari rezulton një person me precedentë penalë, i përfshirë më herët në vepra si plagosje e rëndë me dashje, armëmbajtje pa leje, vjedhje, shkatërrim prone, drejtim mjeti në mënyrë të parregullt, dhunë në familje, goditje për shkak të detyrës, si dhe largim nga vendi i vuajtjes së dënimit.
Edhe i plagosuri, Enkel Dano, figuron me precedentë penalë, kryesisht në fushën e prodhimit dhe shitjes së lëndëve narkotike.
Ndërkohë, policia po vijon kontrollet për kapjen e 37-vjeçarit, si dhe për zbardhjen e plotë të rrethanave të kësaj ngjarjeje.
