Një nga ndeshjet më të bukura të këtij sezoni në Champions League u zhvillua në “Parc des Princes”, ku PSG dhe Bayern Munich dhuruan një spektakël të rrallë me plot 9 gola. Francezët triumfuan 5-4 në një përballje dramatike që la gjithçka të hapur për sfidën e kthimit.
Ishin bavarezët që goditën të parët, me Harry Kane që shënoi nga pika e bardhë në minutën e 17-të. Por reagimi i PSG-së ishte i menjëhershëm, teksa Khvicha Kvaratskhelia barazoi shifrat pas një aksioni të bukur.
Parizienët përmbysën rezultatin në minutën e 33-të me João Neves, që realizoi me kokë pas një goditjeje nga këndi. Bayern nuk u dorëzua dhe riktheu baraspeshën me Michael Olise në fundin e pjesës së parë, por sërish PSG goditi në shtesë me Ousmane Dembélé nga penalltia, duke e mbyllur fraksionin e parë 3-2.
Edhe pjesa e dytë ishte e zjarrtë. Kvaratskhelia realizoi golin e dytë personal dhe të katërtin për PSG-në, ndërsa pak minuta më vonë Dembélé çoi shifrat në 5-2 pas një kundërsulmi të shpejtë.
Kur dukej se ndeshja po mbyllej, Bayern reagoi fuqishëm. Upamecano shënoi me kokë pas një goditjeje dënimi, ndërsa më pas Luis Díaz ngushtoi diferencën në 5-4, duke rikthyer emocionet deri në sekondat e fundit.
Pavarësisht përpjekjeve të bavarezëve për barazim, rezultati nuk ndryshoi më dhe PSG mori një avantazh minimal përpara sfidës së kthimit në “Allianz Arena”.
Një ndeshje që kishte gjithçka: gola, ritëm, emocione dhe dramë deri në fund. Kualifikimi për në finale do të vendoset në 90 minutat e kthimit.
