Mungesa e fuqisë punëtore të kualifikuar është kthyer në pengesën kryesore për zhvillimin e biznesit në Shqipëri, sipas Anketës së Ndërmarrjeve 2025 nga Banka Botërore. Problemi prek të gjitha kategoritë, por është më i theksuar te kompanitë e mëdha, ku rreth 47% e tyre e konsiderojnë si barrierën kryesore për zgjerim. Edhe bizneset e vogla përballen me këtë sfidë, me rreth një të tretën që raportojnë vështirësi në gjetjen e stafit të aftë, çka tregon një mospërputhje të dukshme mes kërkesave të tregut dhe ofertës nga sistemi arsimor.
Pas mungesës së aftësive, shqetësimi i dytë më i madh për bizneset është informaliteti, i cili prek rreth 26–27% të ndërmarrjeve. Ky fenomen krijon konkurrencë të pandershme dhe penalizon bizneset që operojnë sipas rregullave. Ndërkohë, barra tatimore renditet e treta, por për bizneset e mëdha dhe të mesme shqetësimi lidhet më shumë me burokracitë dhe rregulloret e punës sesa me nivelin e taksave, duke theksuar nevojën për më shumë fleksibilitet në menaxhimin e burimeve njerëzore.
Çështje të tjera si energjia, rregulloret tatimore, aksesi në financa dhe korrupsioni kanë një ndikim më të ulët në krahasim me sfidat kryesore. Në fund të listës renditen paqëndrueshmëria politike dhe transporti, të cilat konsiderohen pengesa minimale për biznesin në Shqipëri. Këto gjetje tregojnë se prioriteti kryesor për përmirësimin e klimës së biznesit mbetet investimi në aftësimin e fuqisë punëtore dhe formalizimin e ekonomisë.
