Një moment sa i pazakontë aq edhe komik është regjistruar në një kafene në Stamboll, ku klientët janë ngritur në këmbë dhe kanë dalë me vrap, duke menduar se po ndodhte një tërmet.
Pamjet tregojnë njerëz që po konsumonin kafenë apo po luanin lojëra tavoline, kur papritur ambienti nis të dridhet. Brenda pak sekondash, paniku përhapet dhe të gjithë nxitojnë të dalin jashtë, duke lënë gjithçka pas.
Por e vërteta rezulton krejt ndryshe. Dridhjet nuk kishin lidhje me aktivitet sizmik, por me një makinë që kalonte pranë lokalit, e pajisur me një sistem zanor shumë të fuqishëm. Basi i fortë ka krijuar vibracione të mjaftueshme për të tundur xhamat dhe dyshemenë, duke i mashtruar të pranishmit.
Në një qytet ku frika nga tërmetet është gjithmonë në sfond, reagimi ishte i menjëhershëm. Fatmirësisht, gjithçka përfundoi pa pasoja, duke lënë pas vetëm një situatë që shumëkush do ta kujtojë më shumë me të qeshura sesa me frikë.
