Kryebashkiaku i Tiranë, Erion Veliaj, është transportuar në një spital privat ku i është nënshtruar një ndërhyrjeje kirurgjikale.
Burime mediatike bëjnë me dije se ndërhyrja është kryer nën masa sigurie, ndërsa pas përfundimit të saj, Veliaj është rikthyer sërish në ambientet e paraburgimit ku ndodhet prej disa kohësh.
Deri në këtë moment, nuk janë bërë publike detaje mbi gjendjen shëndetësore apo natyrën e operacionit.
Kujtojmë se Erion Veliaj u arrestua në shkurt të vitit 2025, ndërsa ndaj tij SPAK ka ngritur një sërë akuzash, ku përfshihen korrupsioni pasiv, pastrimi i parave, mosdeklarimi i pasurisë dhe shpërdorimi i detyrës.
Sipas dosjes hetimore, një pjesë e akuzave lidhen me përfitime të dyshuara të parregullta nga subjekte të ndryshme, të cilat më pas kanë përfituar leje ndërtimi dhe fonde publike nga Bashkia e Tiranës.
Në hetim është përfshirë edhe bashkëshortja e tij, Ajola Xoxa, e cila akuzohet për vepra të ngjashme, përfshirë korrupsionin pasiv, pastrimin e parave dhe fshehjen e të ardhurave.
Autoritetet nuk kanë dhënë ende informacion shtesë lidhur me zhvillimet më të fundit në këtë çështje.
