Një zhvillim i papritur ka ardhur nga Shtëpia e Bardhë, ku Donald Trump ka vendosur të anulojë dërgimin e delegacionit amerikan në Pakistan për bisedime me Iranin.
Sipas deklaratës së tij për 'Fox News', Trump ka urdhëruar që negociatorët Steve Witkoff dhe Jared Kushner të mos nisen drejt Pakistanit, duke e konsideruar të panevojshme një udhëtim 18-orësh për negociata që, sipas tij, nuk do të sillnin rezultat.
“Ne i kemi të gjitha kartat. Ata mund të na telefonojnë kur të duan, por nuk ka më fluturime 18-orëshe për të diskutuar pa rezultat,” u shpreh Trump.
Ky vendim vjen në një moment delikat të tensioneve mes Shtetet e Bashkuara të Amerikës dhe Iran, ku përpjekjet diplomatike duket se kanë ngecur.
Ndërkohë, ministri i Jashtëm iranian, Abbas Araghchi, raportohet se është larguar nga Islamabadi, pasi zhvilloi takime me kryeministrin pakistanez gjatë së shtunës.
Anulimi i këtij takimi shihet si një sinjal i fortë nga ana e Uashingtonit, duke treguar një qëndrim më të ashpër dhe më pak të gatshëm për kompromis në këtë fazë të përplasjes diplomatike me Teheranin.
