Vrasja e Endri Goxhajt, gjykata e Gjirokastrës liron dy të përfshirët

Vendimi u mor nga Gjykata e Shkallës së Parë, e cila pranoi kërkesën e prokurores Aulona Haxhiraj, pavarësisht akuzave të rënda që rëndojnë mbi dy të dyshuarit: “vrasje në bashkëpunim” dhe “mbajtje pa leje të armëve”.

Në seancë ishte i pranishëm Aldo Kalemi, ndërsa Dali Nela u përfaqësua nga avokati, pasi vijon të jetë i shtruar në spitalin “Omer Nishani” në Gjirokastër, si pasojë e plagëve të marra. Seanca nisi me vonesë për shkak të mungesës fillestare të trupës gjykuese dhe prokurores.

Sipas prokurorisë, ngjarja nisi si një konflikt mes disa personave dhe përfundoi në përdorim armësh zjarri, duke lënë pas një viktimë. Hetimet janë mbështetur edhe në pamje të sekuestruara, ndërsa në vendngjarje janë gjetur armë, municion, automjete dhe telefona celularë, prova që pritet të ndihmojnë në zbardhjen e plotë të ngjarjes.

Ndërkohë, dy persona të tjerë vijojnë të jenë në kërkim, ndërsa hetimet vazhdojnë për të identifikuar të gjithë të përfshirët. Por për momentin, dy nga emrat kryesorë të kësaj çështjeje do ta ndjekin hetimin nga shtëpia.