Një tërmet me magnitudë 5.7 të shkallës Rihter goditi mëngjesin e sotëm zonën detare pranë Lassithit në Kretë, rreth 23 km në jug-jugperëndim të Goudourasit. Lëkundja ndodhi në orën 06:18 dhe kishte një thellësi prej 9.7 km, duke u ndjerë në të gjithë ishullin, veçanërisht në pjesën lindore.
Autoritetet lokale, përfshirë drejtuesit e bashkive në Sitia dhe Ierapetra, raportuan se tërmeti ishte i fortë dhe i zgjatur, duke shkaktuar shqetësim te banorët. Megjithatë, deri tani nuk ka raportime për dëme materiale apo të lënduar, ndërsa shërbimet emergjente dhe mbrojtja civile janë vënë në gatishmëri.
Pas goditjes kryesore janë regjistruar edhe disa paslëkundje me magnitudë nga 3.5 deri në 3.8. Autoritetet theksojnë se situata po monitorohet nga afër dhe u bëjnë thirrje qytetarëve të ruajnë qetësinë, ndërsa vazhdojnë kontrollet sidomos në zonat me ndërtesa më të vjetra.
