Mediat greke kanë reaguar me kritika ndaj kryeministrit shqiptar Edi Rama, pas takimit të tij me homologun grek Kyriakos Mitsotakis. Sipas raportimeve, vëmendja nuk u përqendrua te çështjet politike, por te paraqitja e Ramës, i cili ishte veshur me atlete sportive të bardha, të konsideruara të papërshtatshme për një takim zyrtar në Rezidencën Maximos.
Artikujt në median greke theksojnë gjithashtu kontrastin në sjelljen e Ramës me Mitsotakis, krahasuar me takimin e mëparshëm që ai pati me kryeministren italiane Giorgia Meloni. Sipas tyre, Rama nuk shfaqi të njëjtin gjest ceremonial si në rastin me Melonin, duke nxitur komente mbi qëndrimet e tij dhe stilin e veçantë që shpesh tërheq vëmendjen ndërkombëtare.
Gjatë takimit, Edi Rama kërkoi ndjesë për veshjen, duke theksuar se nuk ishte informuar nga protokolli për natyrën formale të pritjes. Nga ana tjetër, Kyriakos Mitsotakis reagoi me diplomaci, duke u shprehur se e vlerëson stilin krijues të Ramës në të veshur, një koment që mediat greke e interpretuan si ironik në kontekstin e kritikave të ngritura.
