Balluku, pavarësisht se e ka humbur pushtetin në Qeveri, kërkon të forcojë pozitat e saj në parti dhe sidomos në Qarkun e Fierit, ku është drejtuese.
Prej kohësh në Fier flitet për një përplasje të hapur mes kryebashkiakut Armando Subashi dhe krahut tjetër politik, dhe zhvillimet e fundit duket se i hedhin më shumë “benzinë zjarrit”.
Nënkryetarja e Këshillit Bashkiak, Fatbardha Merkaj, e njohur si një nga njerëzit e afërt të Belinda Ballukut, ka kërkuar mbledhjen e Këshillit ditën e enjte. Në rendin e ditës është përfshirë edhe një pikë e fortë: votimi për shkarkimin e kryetares së Këshillit Bashkiak, Antoneta Çunaj.
Në letrën e publikuar nga Vox News nuk jepen arsyet konkrete të kësaj kërkese, por lëvizja lexohet qartë si një kapitull i radhës në përplasjen politike mes Ballukut dhe Subashit në Fier.
Mbledhja e së enjtes pritet të jetë më shumë sesa një procedurë formale, një provë force që mund të tregojë hapur se kush ka realisht peshën vendimmarrëse në Bashki: Balluku apo Subashi.
