Zbardhen detaje të reja nga ngjarja e rëndë e ndodhur mbrëmjen e kësaj të marte në Memaliaj, ku një 30-vjeçar humbi jetën si pasojë e të shtënave me armë zjarri.
Sipas njoftimit zyrtar të policisë, ngjarja ka ndodhur rreth orës 20:50, pas një konflikti mes palëve. Dyshohet se autori, 29-vjeçari Donald Nela, ka qëlluar me armë ndaj 30-vjeçarit Endi Goxhaj alias Shehu. Ky i fundit nuk ka mundur t’u mbijetojë plagëve dhe ka ndërruar jetë gjatë transportimit për në spital.
Nga kjo ngjarje ka mbetur i plagosur edhe vëllai i autorit të dyshuar, 25-vjeçari Darjo Nela, i cili sipas informacioneve ndodhet jashtë rrezikut për jetën. Ende nuk është e qartë se si ai ka marrë plagët.
Pas krimit, autori është larguar me automjet nga vendngjarja, ndërsa forcat e policisë janë vënë në ndjekje për kapjen e tij.
Ndërkohë, është ngritur një grup i posaçëm hetimor, nën drejtimin e Prokurorisë, për të zbardhur plotësisht rrethanat e ngjarjes dhe për të dokumentuar ligjërisht këtë krim të rëndë.
