Një operacion masiv i koordinuar nga Drejtoria Anti-mafia e Distriktit të Trentos ka tronditur themelet e krimit të organizuar shqiptar në veriun e Italisë mëngjesin e kësaj të hëne. Mediat italiane, përfshirë gjigantin informativ TGCom, raportojnë se forcat e rendit kanë vënë në pranga 28 shtetas shqiptarë me banim në Itali, duke finalizuar kështu një hetim voluminoz që kishte nisur që në vitin 2023.
Operacioni i koduar me emrin kuptimplotë "Daku", përfshiu dhjetëra oficerë nga skuadra të ndryshme lëvizëse provinciale, të cilët u angazhuan në një aksion kompleks për të çmontuar një rrjet të shtrirë që kontrollonte tregun e drogës në të gjithë zonën e Tirolit Jugor.
Hetuesit zbuluan një strukturë kriminale tejet të sofistikuar, e cila nuk mjaftohej vetëm me importimin e lëndëve narkotike, por kishte shtrirë tentakulat në një shpërndarje kapilare në të gjithë rajonin.
Përmes një rrjeti të gjerë korrierësh dhe shitësish të vegjël, grupi kishte arritur të dominonte tregun ilegal duke përdorur metoda të shpejta dhe gjoja të sigurta, duke eliminuar me forcë çdo formë konkurrence.
Bilanci i këtij goditjeje është mbresëlënës, pasi policia arriti të sekuestronte 24 kilogramë kokainë të pastër, 23 kilogramë marihuanë, sasi të konsiderueshme hashashi dhe mbi 76,000 euro cash, të cilat konsiderohen si fitime direkte nga aktiviteti kriminal. Përveç lëndës narkotike, hetuesit ranë edhe në gjurmët e një arme zjarri, e cila dëshmon rrezikshmërinë e lartë të këtij grupi.
E gjithë arkitektura e këtij hetimi u ndërtua mbi dokumentimin e më shumë se 150 episodeve të trafikut, të cilat u vërtetuan përmes vëzhgimeve në terren, regjistrimeve video dhe fotografive të shumta.
Të dyshuarit kishin krijuar një sistem komunikimi hermetik për t'i shpëtuar përgjimeve, duke përdorur numra telefoni fiktivë, biseda të koduara dhe platforma sociale që vështirësonin gjurmimin e tyre.
Rruga e drogës niste nga Belgjika dhe Spanja, ku lënda narkotike fshihej në funde të rreme brenda makinave që transportonin deri në 15 kilogramë për rrugë. Për të minimizuar rrezikun, organizata i ruante sasitë e mëdha në vende që nuk kishin lidhje direkte me anëtarët e saj, duke siguruar kështu një furnizim të pandërprerë për tregun vendas.
Struktura e bandës ishte e ndarë në pesë celula të ndryshme, të cilat çuditërisht nuk kishin njohje me njëra-tjetrën, një taktikë kjo për të mbrojtur organizatën në rast arrestimesh. Çdo grup kishte detyra të ndara qartë, duke filluar nga blerja, transporti, përpunimi e deri te shitja finale.
Megjithatë, ajo që e bënte këtë organizatë veçanërisht të frikshme ishte grupi i fundit, i cili kishte për detyrë mbledhjen e borxheve të prapambetura. Ky "krah i armatosur" nuk hezitonte të përdorte dhunë brutale dhe armë zjarri ndaj kujtdo që nuk shlyente detyrimet në kohë, duke vulosur kështu profilin e një organizate me tipare të pastra mafioze.
