Irani ka paralajmëruar se mund të mbyllë sërish Ngushticën e Hormuzit nëse Shtetet e Bashkuara nuk heqin bllokadën ndaj porteve iraniane. Kryetari i parlamentit, Mohammad Baqer Ghalibaf, deklaroi se në rast vazhdimi të presionit ekonomik, kjo rrugë strategjike detare nuk do të mbetet e hapur dhe se kalimi i anijeve do të bëhet vetëm sipas rregullave të vendosura nga Irani.
Nga ana tjetër, presidenti i SHBA-së, Donald Trump, la të hapur mundësinë që armëpushimi aktual të mos zgjatet nëse nuk arrihet një marrëveshje me Teheranin. Ai paralajmëroi se në rast dështimi të negociatave, situata mund të përshkallëzohet sërish, duke përfshirë edhe veprime ushtarake, duke theksuar se vendimi do të varet nga rezultati i bisedimeve që pritet të përfundojnë brenda afatit të caktuar.
Ndërkohë, burime iraniane bëjnë të ditur se delegacionet e të dy vendeve pritet të mbërrijnë në Pakistan gjatë fundjavës për të zhvilluar bisedime të mundshme të hënën. Megjithatë, autoritetet amerikane ende nuk kanë konfirmuar zyrtarisht këto takime, duke lënë të paqartë nëse negociatat do të zhvillohen sipas planit.
