Çmimet e naftës kanë pësuar një rënie të fortë prej mbi 10% brenda më pak se dy orësh, pasi Irani shpalli “plotësisht të hapur” Strait of Hormuz për pjesën e mbetur të armëpushimit me SHBA-në.
Njoftimi u bë nga ministri i Jashtëm iranian, Abbas Araghchi, i cili theksoi se vendimi është në përputhje me zhvillimet e fundit në rajon dhe armëpushimin në Liban.
Reagimi në tregjet globale ishte i menjëhershëm. Nafta amerikane (WTI) ra me më shumë se 12%, duke zbritur në rreth 82 dollarë për fuçi, ndërsa Brent pësoi rënie prej rreth 10%, duke arritur në afërsisht 88 dollarë për fuçi.
Në të njëjtën kohë, tregjet financiare u rritën ndjeshëm. Indekset kryesore amerikane si S&P 500 dhe Nasdaq Composite arritën nivele rekord të reja, me rritje mbi 1% në orët e para të tregtimit. Ndërsa Dow Jones Industrial Average u rrit edhe më shumë, mbi 1.7%, duke rikuperuar prapambetjen e ditëve të fundit.
Presidenti amerikan Donald Trump përshëndeti vendimin e Iranit, por njëkohësisht theksoi se bllokada detare amerikane ndaj porteve iraniane “do të mbetet plotësisht në fuqi” deri në përfundimin e negociatave.
Trump shtoi se “shumica e pikave janë tashmë të negociuara” dhe se procesi për një marrëveshje afatgjatë “duhet të ecë shumë shpejt”, megjithëse deri tani nuk janë bërë publike detaje konkrete.
Megjithatë, mbetet e paqartë se sa shpejt dhe në çfarë niveli do të rikthehet trafiku normal në Ngushticën e Hormuzit. Tregjet aktualisht po reflektojnë pritshmëritë për një zgjidhje përfundimtare të konfliktit brenda këtij muaji.
Me afrimin e fundjavës, investitorët kanë vetëm sesionin e së premtes për të përthithur këto zhvillime të shpejta dhe për t’i reflektuar në tregje.
