Pa u shuar ende jehona e ngjarjes tragjike ku një 19-vjeçare u gjet në agoni dhe humbi jetën rrugës për në spital, pasi ishte braktisur në mes të rrugës, një tjetër rast i rëndë ka tronditur opinionin publik. Mëngjesin e së premtes (17 prill), trupi i pajetë i një vajze të re u gjet duke lundruar në ujërat e Kanalit të Korinthit.
Sipas raportimeve të mediave greke, dyshohet se viktima është rreth 18-19 vjeç, ndërsa identiteti i saj mbetet ende i panjohur.
Menjëherë pas sinjalizimit, autoritetet u vunë në lëvizje, duke nisur operacionin për nxjerrjen e trupit në tokë, në zonën e Posidonias, në Korinth. Në vendngjarje ndodhen oficerët e Autoritetit Portual të Korinthit, të cilët po punojnë për rikuperimin e trupit.
Pas nxjerrjes, trupi do të transportohet me ambulancë drejt shërbimeve përkatëse, ku do t’i nënshtrohet procedurave të identifikimit dhe ekspertizës mjeko-ligjore, me qëllim zbardhjen e plotë të rrethanave të vdekjes.
Hetimet pritet të përcaktojnë nëse bëhet fjalë për një akt vetëvrasjeje apo nëse kemi të bëjmë me një ngjarje me elementë të mundshëm kriminalë.
