Presidenti Donald Trump tha se Irani ka rënë dakord të dorëzojë uraniumin e pasuruar, një nga pikat kyçe të pengesës në negociatat për t'i dhënë fund luftës. Bisedimet e reja, tha ai, mund të rifillojnë që këtë fundjavë, me Uashingtonin dhe Teheranin shumë afër arritjes së një marrëveshjeje.
BBC raporton se, duke folur në një aktivitet në Las Vegas, i cili u përqendrua në ekonominë amerikane, presidenti amerikan dha një nga vlerësimet e tij më optimiste për luftën që nga fillimi i saj. Ai tha se ajo po shkonte shumë shpejt dhe duhet të mbaronte së shpejti.
Më parë, në Shtëpinë e Bardhë, ai tha se Irani kishte rënë dakord të mos pajisej me armë bërthamore dhe do të dorëzonte atë që ai e quajti "pluhur bërthamor" – uranium të pasuruar që besohet se është varrosur nën tokë pas sulmeve ajrore SHBA-Izrael vitin e kaluar. Irani nuk ka komentuar mbi pretendimin e presidentit.
Me sa duket i bindur se një raund i ri bisedimesh ballë për ballë është i afërt, Trump tha se nuk ishte i sigurt nëse një zgjatje e armëpushimit me Iranin, i cili do të skadojë pas pesë ditësh, ishte e nevojshme
