Situatë e tensionuar është regjistruar në zonën e Rrjollit, ku banorët kanë dalë kundër vijimit të punimeve në terren, duke bllokuar për disa orë aktivitetin e mjeteve dhe punëtorëve në zonë.
Sipas banorëve, toka në fjalë është pronë e tyre dhe çdo ndërhyrje apo projekt ndërtimi po kryhet pa zgjidhur më parë çështjen e pronësisë. Ata kanë deklaruar se nuk do të lejojnë vijimin e punimeve pa një sqarim të plotë ligjor dhe institucional mbi territorin.
Në protestën e tyre, banorët i kanë bërë gjithashtu thirrje biznesmenit Bashkim Ulaj, duke kërkuar që të tërhiqet nga çdo veprim në zonë deri në zgjidhjen e konfliktit, pasi sipas tyre toka është e trashëguar dhe u përket familjeve vendase.
Prej disa orësh, punimet janë ndërprerë për shkak të pranisë së banorëve në terren, ndërsa situata është ndjekur nga afër për të shmangur përshkallëzimin e tensioneve.
Banorët theksojnë se do të vijojnë qëndrimin e tyre deri në një reagim zyrtar nga institucionet përkatëse, duke kërkuar transparencë dhe verifikim të plotë të dokumentacionit të pronësisë në zonë.
