Një incident shqetësues është regjistruar pak ditë më parë pranë tunelit të Llogarasë, ku një drejtues mjeti ka rrezikuar seriozisht jetën e përdoruesve të tjerë të rrugës përmes një veprimi të papërgjegjshëm.
Sipas të dhënave, menjëherë pasi ka dalë nga tuneli, në një segment rrugor me vijë të pandërprerë dhe vetëm një korsi për zbritje, shoferi ka kryer një parakalim të rrezikshëm, duke shkelur rregullat bazë të qarkullimit rrugor. Manovra në fjalë ka ndodhur në një moment kur një automjet tjetër po lëvizte normalisht në korsinë e tij, duke e bërë situatën edhe më të rrezikshme.
Burime nga vendngjarja bëjnë me dije se drejtuesi i mjetit me targë AB 195 BG ka ndërmarrë parakalimin në kushte të papërshtatshme, duke vënë në rrezik përplasje të mundshme frontale. Falë reagimit të shpejtë të shoferit tjetër, u shmang për pak një aksident me pasoja fatale.
Ky rast rikthen në vëmendje nevojën për respektim rigoroz të rregullave të qarkullimit, sidomos në zona të rrezikshme si segmentet malore. Ndërkohë, pritet që Policia Rrugore të marrë masa ndaj shkelësve të tillë, për të parandaluar ngjarje që mund të përfundojnë në tragjedi.
