Në fshatin Zdranjsh-Verri të Librazhdit, banorët kanë përfunduar me forcat e tyre një investim që normalisht duhet të ishte detyrë e pushtetit vendor: rrugën e varrezave të fshatit.
Pa asnjë financim publik, komuniteti mblodhi rreth 12 milionë lekë dhe realizoi shtrimin me beton të segmentit, duke e kthyer një nevojë bazë në një projekt të vetëfinancuar nga banorët. Punimet u kryen me kontributin e të gjithë djemve të fshatit, në një përpjekje të përbashkët për të zgjidhur një problem që prej vitesh kishte mbetur pa zgjidhje.
Por ky proces, sipas banorëve, nuk ka qenë aspak i lehtë. Ata akuzojnë Bashkinë Librazhd dhe Mariglen Dishën se jo vetëm ka munguar në mbështetje, por madje ka tentuar të krijojë pengesa gjatë punimeve. Sipas tyre, është ushtruar presion ndaj disa furnitorëve të betonit që të mos i shërbenin komunitetit për këtë projekt.
Për shkak të kësaj situate, banorët janë detyruar të sigurojnë betonin nga një kompani në Prrenjas, me kosto më të lartë, duke e bërë edhe më të vështirë barrën financiare të një investimi që duhej të ishte i garantuar nga shteti lokal.
Pavarësisht këtyre vështirësive, rruga u përfundua me sukses, duke u kthyer në një shembull të vetorganizimit të komunitetit, por edhe në një dëshmi të mungesës së ndërhyrjes institucionale.
Banorët shprehen se rruga e varrezave nuk është një luks apo projekt dytësor, por një nevojë themelore që lidhet me dinjitetin dhe aksesin e çdo familjeje. Në vend të mbështetjes, ata thonë se janë përballur me indiferencë dhe pengesa, duke ngritur pikëpyetje serioze mbi rolin e bashkisë në zonat rurale.
Ky rast në Zdranjsh-Verri po shihet si një tjetër shembull ku komuniteti detyrohet të zëvendësojë institucionet, duke investuar vetë aty ku pushteti vendor mungon.
