Presidenti i SHBA-së, Donald Trump, ka publikuar në rrjetet sociale një imazh të krijuar nga Inteligjenca Artificiale, ku paraqitet si “Mesia”. Në figurë, ai shfaqet i veshur me rroba të bardha dhe të kuqe, duke vendosur dorën mbi ballin e një personi të sëmurë, ndërsa një dritë hyjnore e rrethon, së bashku me figura të tjera që e shohin në mënyrë adhurimi.
Postimi është bërë në platformën Truth Social, menjëherë pas deklaratave të tij kritike ndaj Papa Leone XIV. Trump e akuzoi Papën se po i shërben së majtës radikale dhe se duhet të sillet si një lider fetar dhe jo si politikan, duke shtuar se zgjedhja e tij në krye të Vatikanit nuk do të kishte ndodhur pa ndikimin e tij si president.
Nga ana tjetër, Papa Leone XIV reagoi duke theksuar se nuk do të ndalojë së foluri për paqen dhe dialogun, pavarësisht kritikave. Ai nënvizoi rëndësinë e përfundimit të konflikteve dhe promovimit të bashkëpunimit ndërkombëtar, duke mbajtur një qëndrim të qartë kundër përshkallëzimit të tensioneve.
