Një apel i ndjerë për ndihmë ka mbërritur në redaksinë e JOQ Albania nga nëna e dy vëllezërve të mitur, Kristjanit 13 vjeç dhe Mateos 10 vjeç, të cilët po përballen me një sëmundje gjenetike të rrallë dhe serioze, Friedreich’s Ataxia.
Në videon e dërguar në redaksinë tonë, nëna e tyre, Blerta Daci, kërkon ndihmën dhe solidaritetin e të gjithë shqiptarëve për t’u dhënë djemve një shans për një jetë më të mirë.
“Përshëndetje! Quhem Blerta Daci. Jam nëna e dy djemve, Kristjanit dhe Mateos, me sëmundje gjenetike, të dy. Kërkojnë një ndërhyrje kirurgjikale në Turqi, për shërimin e tyre nga skolioza dhe mundësinë që ata të ecin sërish. Është shumë e kushtueshme për familjen tonë”, shprehet ajo.
Në video, njëri prej vëllezërve përlot me fjalët e tij të thjeshta:
“Ju lutem më ndihmoni mua dhe vëllain tim!”
Dy të miturit vuajnë nga Friedreich’s Ataxia, një sëmundje e rrallë gjenetike që prek sistemin nervor dhe lëvizjen, duke e bërë çdo ditë një sfidë të madhe për ta dhe familjen e tyre.
Mjekët kanë rekomanduar që trajtimi dhe ndërhyrja kirurgjikale të kryhen në një spital në Turqi, pasi këto procedura nuk realizohen në Shqipëri. Kostoja totale e trajtimit arrin në rreth 170 mijë euro, një shumë e papërballueshme për familjen.
Familja ka hapur edhe një faqe GoFundMe, ku çdo kontribut, sado i vogël, mund të bëjë diferencën dhe t’u japë Kristjanit dhe Mateos mundësinë për trajtim dhe shpresën për të ecur sërish.
JOQ Albania i bashkohet këtij apeli dhe fton të gjithë ata që kanë mundësi të kontribuojnë për t’u ardhur në ndihmë dy vëllezërve të vegjël.
Çdo ndihmë është një shpresë për jetën e tyre.
