“Alfred Beleri i akuzuar”, 32 vite nga masakra e Peshkëpisë ku u vranë dy oficerë shqiptarë

Ngjarja e rëndë ndodhi në pikën kufitare të Peshkëpisë, pranë fshatit me të njëjtin emër në Dropull, rreth katër kilometra brenda territorit shqiptar. Një grup i armatosur, i përbërë nga tetë persona me uniforma ushtarake greke dhe të maskuar, sulmoi repartin kufitar në orët e para të mëngjesit.

Fillimisht, autorët vranë ushtarin roje Arsen Gjini, ndërsa më pas hynë në ambientet e kazermës, ku qëlluan për vdekje edhe komandantin e stërvitjes, Fatmir Shehu. Nga sulmi mbetën të plagosur edhe tre ushtarakë të tjerë.

Sipas të dhënave, sulmi u mor përsipër nga një formacion paraushtarak i lidhur me një grup nacionalist grek, i cili në atë kohë promovonte ide për ndryshime territoriale në jug të Shqipërisë.

Një vit pas ngjarjes, autoritetet greke arrestuan shtatë persona të dyshuar për përfshirje në sulm, mes tyre edhe Alfred Beleri, i cili në atë kohë ishte 23 vjeç. Megjithatë, Gjykata e Athinës vendosi lirimin e tyre, duke argumentuar se nuk kishte prova të mjaftueshme për t’i shpallur fajtorë.