Shtëpia e Bardhë ka reaguar ashpër ndaj raportimeve të fundit mbi negociatat me Iranin, duke i cilësuar një pjesë të tyre si të pasakta dhe duke mohuar se propozimi fillestar i Teheranit ishte i pranueshëm për Uashingtonin.
Gjatë konferencës për shtyp të mbrëmjes, zëdhënësja Karoline Leavitt deklaroi se plani fillestar me 10 pika i paraqitur nga Irani ishte “thelbësisht joserioz, i papranueshëm dhe i hedhur plotësisht poshtë”.
Sipas saj, presidenti Donald Trump dhe ekipi i tij negociator e refuzuan menjëherë propozimin.
“U hodh në koshin e plehrave nga Presidenti Trump dhe ekipi i tij negociator”, u shpreh Leavitt, duke theksuar se disa media kanë raportuar gabimisht sikur ky plan ishte konsideruar i pranueshëm nga SHBA.
Ajo akuzoi drejtpërdrejt disa media ndërkombëtare për raportim të pasaktë dhe për përhapje të asaj që Shtëpia e Bardhë e konsideron narrativë të shtrembëruar mbi bisedimet.
Megjithatë, Leavitt bëri të ditur se më pas Irani ka paraqitur një propozim të dytë, të modifikuar, të cilin Uashingtoni e konsideron një “bazë të zbatueshme” për negociata të mëtejshme.
Deklarata vjen në një moment tensioni të lartë diplomatik, ku armëpushimi në rajon mbetet i brishtë dhe negociatat mes palëve pritet të vazhdojnë në ditët në vijim.
