Prokurorët e SPAK kanë zhvilluar një aksion kontrolli në ambientet e burgut të Durrësit, në kuadër të përpjekjeve për goditjen e sendeve të ndaluara brenda institucioneve të vuajtjes së dënimit. Kontrollet janë shtrirë në disa sektorë të burgut, duke synuar evidentimin dhe sekuestrimin e çdo objekti të paligjshëm që mund të përdoret nga të dënuarit.
Operacioni është përqendruar edhe në disa qeli të veçanta, përfshirë atë ku ndodhet kryebashkiaku i Tiranës, Erion Veliaj, ish-ministri i Shëndetësisë Ilir Beqaj, si dhe ish-prokurori i Vlorës Aurel Zarka. Sipas burimeve, gjatë kontrolleve në këto qeli nuk është konstatuar asnjë send i jashtëligjshëm.
Ndërkohë, gjatë kontrolleve në një godinë tjetër të burgut, është gjetur një aparat celular i fshehur në ambientet e tualetit. Autoritetet po vijojnë verifikimet për të përcaktuar se kujt i përket pajisja dhe nëse ka lidhje me ndonjë aktivitet të paligjshëm brenda institucionit.
