Bota e sportit ka marrë sot një lajm tronditës pas njoftimit se trajneri legjendar rumun, Mircea Lucescu, ka ndërruar jetë në moshën 80-vjeçare. Tekniku i mirënjohur nuk arriti ta fitonte betejën me pasojat e një sulmi në zemër që pësoi së fundmi, duke u shuar në Spitalin Universitar ku po qëndronte i shtruar prej disa ditësh nën kujdesin intensiv të mjekëve.
Problemet e tij shëndetësore nisën në mënyrë të papritur gjatë kohës që ishte i angazhuar me ekipin kombëtar të Rumanisë. Lucescu u ndje keq gjatë një takimi teknik përpara ndeshjes miqësore kundër Sllovakisë, sfidë në të cilën ai nuk mundi të ishte i pranishëm në stol. Pasi u dërgua me urgjencë në spital, gjendja e tij u rëndua të premten e 3 prillit kur pësoi atakun kardiak, nga i cili fatkeqësisht nuk arriti të rikuperohej më.
Lajmi i hidhur vjen vetëm pak ditë pas përfundimit të mandatit të tij të dytë në krye të përfaqësueses rumune. Lucescu u emërua në këtë detyrë në gusht të vitit 2024, me misionin për të dërguar vendin e tij në majat e futbollit botëror. Ai u largua nga stoli i Rumanisë pas dështimit të dhimbshëm për t'u kualifikuar në Kupën e Botës 2026, si pasojë e humbjes minimale 0-1 kundër Turqisë në Stamboll, ndeshje e cila mbetet edhe akti i tij i fundit në krye të kombëtares.
Mircea Lucescu largohet duke lënë pas një trashëgimi të jashtëzakonshme që e rreshton atë ndër emrat më të mëdhenj të historisë së futbollit. Gjatë karrierës së tij brilante, ai arriti të fitonte plot 37 trofe, një shifër marramendëse që e pozicionon atë si trajnerin e tretë më të suksesshëm të të gjitha kohërave në nivel global. Ai qëndron me krenari në "podiumin" e titujve krahas ikonave si Sir Alex Ferguson dhe Pep Guardiola, duke mbetur përjetësisht një simbol i dijës, strategjisë dhe suksesit në fushën e blertë.
