Eksplorimi i hapësirës ka shënuar sot një kapitull të ri të jashtëzakonshëm, duke lënë pas epokën e artë të viteve '70. Ekuipazhi i misionit Artemis II të NASA-s ka arritur zyrtarisht distancën më të madhe nga Toka që ka shkelur ndonjëherë qenia njerëzore, duke thyer rekordin historik të vendosur nga misioni legjendar Apollo 13 në prill të vitit 1970.
Pak para orës 19:00 sipas kohës së Greenwich-it, kapsula Orion, me katër astronautë në bord, tejkaloi kufirin prej 248 mijë e 655 miljesh, duke e shtyrë praninë njerëzore në kozmos me mbi 4 mijë e 100 milje më tej se çdo mision i mëparshëm.
Ky moment historik nuk ishte vetëm një triumf teknologjik, por edhe një çast i ngarkuar me emocione të forta njerëzore për ekipin e përbërë nga Komandanti Reid Wiseman, Piloti Victor Glover dhe Specialistët e Misionit Christina Koch dhe Jeremy Hansen.
Në shenjë nderimi dhe dashurie, ekuipazhi propozoi që një krater hënor, i vendosur në kufirin delikat mes anës së dukshme dhe asaj të padukshme të Hënës, të mbajë emrin e gruas së ndjerë të Komandantit Wiseman, Carroll Taylor Wiseman.
Specialistit Jeremy Hansen shpjegoi se ky krater do të jetë periodikisht i dukshëm nga Toka, duke shërbyer si një simbol i përjetshëm i integritetit. Kontrolli i Misionit në Houston e miratoi këtë kërkesë emocionuese, duke regjistruar zyrtarisht emërtimin "Krateri Integrity dhe Carroll".
Përgjatë 24 orëve të ardhshme, misioni do të hyjë në fazën e tij më kritike dhe spektakolare, ndërsa anija Orion kryen një "lëshim" rreth Hënës. Ky manovrim do t'u lejojë astronautëve të shohin me sytë e tyre rajone të sipërfaqes hënore që nuk janë vëzhguar kurrë më parë drejtpërdrejt nga njerëzit.
Një moment tensioni dhe heshtjeje pritet në orën 23:44 GMT, kur komunikimi me Tokën do të ndërpritet përkohësisht ndërsa Orion kalon pas anës së errët të satelitit. Gjatë kësaj kohe, anija do të arrijë pikën më të afërt me Hënën dhe ekuipazhi do të përjetojë një eklips diellor të rrallë rreth orës 01:35 GMT, duke u ofruar atyre një pamje unike të kozmosit.
Jeremy Hansen theksoi se ky rekord i ri nuk është vetëm një arritje e sotme, por një homazh për të gjithë paraardhësit që hapën rrugën drejt yjeve, duke shprehur shpresën se gjeneratat e ardhshme do ta thyejnë këtë kufi edhe më shpejt.
Pas përfundimit të kësaj fluturimi historik rreth Hënës, ekuipazhi do të nisë udhëtimin e kthimit katërditor. Ulja në oqean, pranë San Diegos, parashikohet të ndodhë më 10 prill, duke përmbyllur me sukses udhëtimin nëntëditor që nisi nga Florida.
Ky sukses i Artemis II i hap rrugën misionit Artemis III për testimin e ankorimeve robotike dhe kulmon me Artemis IV në vitin 2028, i cili do të shënojë rikthimin e njeriut me këmbë në tokën hënore, konkretisht në polin jugor të satelitit.
