Banorët e Labovës së Madhe po përballen me një problem serioz: rruga kryesore e fshatit është dëmtuar rëndë dhe pothuajse e pakalueshme.
Sipas denoncimit të një qytetareje, çarjet dhe shembjet në rrugë rrezikojnë jetën e banorëve dhe e bëjnë lëvizjen e automjeteve dhe këmbësorëve jashtëzakonisht të vështirë.
Ajo thotë se situata është alarmante, sidomos për fëmijët dhe të moshuarit, por edhe për çdo emergjencë që mund të ndodhë.
Banorët theksojnë se gjendja e rrugës e bën aksesin e shpejtë të automjeteve të urgjencës pothuajse të pamundur, duke rritur rrezikun në çdo incident.
Fotot e dërguara nga banorët tregojnë çarjet e thella dhe pjesët e shembura të asfaltit, duke bërë të qartë gjendjen kritike të rrugës. Sipas tyre, ndërhyrja e menjëhershme nga institucionet përgjegjëse është thelbësore për të parandaluar aksidente dhe për të siguruar qarkullim normal.
Banorët e Labovës së Madhe u bëjnë thirrje autoriteteve lokale dhe qendrore që të reagojnë sa më shpejt, duke e cilësuar problemin si emergjent dhe të rrezikshëm për sigurinë publike.
Denoncimi i qytetares:
Përshëndetje JOQ, Po ju shkruaj për një problem shumë serioz në fshatin Labovë e Madhe. Rruga kryesore e fshatit është dëmtuar rëndë dhe është pothuajse e pakalueshme. Siç shihet edhe në foto, rruga është çarë dhe shembur, duke rrezikuar jetën e banorëve dhe duke e bërë shumë të vështirë lëvizjen e mjeteve dhe këmbësorëve.
Situata është alarmante, sidomos për fëmijët, të moshuarit dhe për çdo emergjencë që mund të ndodhë, pasi aksesi është shumë i vështirë. Kërkojmë ndërhyrje urgjente nga institucionet përgjegjëse për të rregulluar këtë problem sa më shpejt. Ju lutem publikojeni që të dëgjohet zëri ynë. Faleminderit!
