Besimtarë të shumtë katolikë janë mbledhur këtë mbrëmje në Katedralen Katolike të 'Shën Palit' në Tiranë për të marrë pjesë në Meshën e Vigjiljes së Pashkëve, një nga ceremonitë më të rëndësishme dhe më domethënëse të festës së Ringjalljes.
Ceremonia e shenjtë po drejtohet nga Kryeipeshkvi Arjan Dodaj, i cili po udhëheq lutjet, leximet biblike dhe ritualet tradicionale që shoqërojnë këtë natë të veçantë për komunitetin e krishterë.
Vigjilja e Pashkëve përfaqëson simbolikisht kalimin nga errësira drejt dritës, duke përkujtuar ringjalljen e Krishtit dhe duke përcjellë një mesazh të fortë shprese, besimi dhe paqeje. Gjatë ceremonisë ndizet qiriu i Pashkëve, një nga momentet më domethënëse të meshës, që simbolizon triumfin e dritës mbi errësirën dhe të jetës mbi vdekjen.
Në ambientet e katedrales mbizotëron një atmosferë e ngrohtë shpirtërore, ku besimtarët janë bashkuar në lutje dhe këngë liturgjike, ndërsa nuk mungojnë edhe urimet tradicionale për paqe, dashuri dhe mirësi në çdo familje shqiptare.
Ky është një nga momentet më të rëndësishme të festimeve të Pashkëve, që çdo vit mbledh shumë besimtarë në një natë reflektimi dhe besimi.
Redaksia e JOQ Albania iu uron të gjithë besimtarëve katolikë: Gëzuar Pashkët! Paqe, shëndet dhe mirësi në familjet tuaja.
