“Los Blancos” zhgënjyen sërish, duke zhvilluar një nga ndeshjet më të dobëta të këtij sezoni dhe duke krijuar shumë pak raste. Rasti i vetëm i rrezikshëm në pjesën e parë erdhi në minutën e 22-të, kur Kylian Mbappé tentoi portën, por u ndal nga portieri Leo Román.
Mallorca shfrytëzoi pasigurinë në mbrojtjen madrilene dhe kaloi në avantazh në minutën e 42-të. Pas një krosimi nga Pablo Maffeo, përfitoi Manu Morlanes, i cili dërgoi topin në rrjetë.
Në pjesën e dytë ritmi ra, ndërsa Real Madrid u përpoq të reagonte në minutat e fundit. Goli i barazimit erdhi në minutën e 88-të, kur Éder Militão, i futur si zëvendësues, shënoi me kokë pas një goditjeje këndi të ekzekutuar nga Trent Alexander-Arnold.
Megjithatë, reagimi i vendasve ishte i menjëhershëm. Në minutën e parë shtesë, Vedat Muriqi realizoi golin e fitores pas një kundërsulmi të shpejtë të nisur nga portieri Román, duke çuar topin në rrjetë me saktësi dhe duke shënuar golin e tij të 19-të sezonal.
Me këtë sukses, Mallorca merr tre pikë të arta në garën për mbijetesë, ndërsa Real Madrid regjistron humbjen e pestë të sezonit.
