Një moment historik për eksplorimin hapësinor është shënuar me misionin Artemis 2, teksa katër astronautët janë nisur drejt Hënës pasi u shkëputën me sukses nga orbita e Tokës. Ky është fluturimi i parë me ekuipazh i NASA-s në këtë program të ri, duke hapur rrugën për rikthimin e njerëzve në Hënë pas dekadash.
Në lidhjen e parë me Tokën, komandanti Reid Wiseman e përshkroi përvojën si të jashtëzakonshme. Ndërsa astronauti kanadez Jeremy Hansen u shpreh se ndihej si një fëmijë në aventurën e tij të parë në hapësirë, duke e cilësuar eksperiencën si magjepsëse.
Misioni 10-ditor synon të përgatisë terrenin për një ulje në Hënë në vitin 2028 dhe pritet të vendosë rekorde të reja, duke çuar ekuipazhin deri në mbi 400 mijë kilometra larg Tokës. Ai shënon gjithashtu një hap të rëndësishëm drejt krijimit të një pranie të qëndrueshme njerëzore në Hënë dhe zgjerimit të eksplorimit në hapësirë.
