Një ngjarje tragjike ka ndodhur në Peru, ku të paktën një person ka humbur jetën dhe 47 të tjerë kanë mbetur të plagosur në stadiumin Alejandro Villanueva Stadium, shtëpia e klubit Alianza Lima.
Sipas agjencisë spanjolle të lajmeve EFE, bilanci i viktimave është konfirmuar nga ministri peruan i Shëndetësisë, Juan Carlos Velasco.
Fillimisht u raportua për shembjen e një muri në tribunën jugore të stadiumit, e njohur si “Matute”, por kjo u mohua nga zjarrfikësit, të cilët sqaruan se struktura e impiantit është në gjendje të mirë dhe nuk ka pasur asnjë shembje.
Sipas autoriteteve, incidenti ndodhi si pasojë e shtyrjes së turmës gjatë një grumbullimi të madh tifozësh, ku njerëzit u shtypën mes tyre, duke sjellë pasoja fatale. Ngjarja ndodhi ndërsa tifozët ishin mbledhur në një atmosferë festive për të mbështetur ekipin e tyre, madje kishin përgatitur edhe një banderolë gjigande për këtë rast.
