Teherani zyrtar ka rritur ndjeshëm tonet e kërcënimeve ushtarake, duke lëshuar urdhra të prerë për shtabet operacionale që të monitorojnë çdo lëvizje të forcave të Shteteve të Bashkuara dhe Izraelit. Komandanti i përgjithshëm i ushtrisë iraniane, gjatë një takimi urgjent me krerët e lartë ushtarakë, ka kërkuar një mbikëqyrje "moment pas momenti" të lëvizjeve të kundërshtarëve, me qëllim që t'i kundërpërgjigjen me forcë çdo skenari të mundshëm për një pushtim tokësor.
Në një video të publikuar nga agjencia shtetërore e lajmeve, IRNA, shefi i Forcave të Armatosura, Amir Hatami, shfaqet duke instruktuar drejtuesit e ushtrisë për një mbrojtje agresive dhe asgjësuese. Sipas përmbledhjes zyrtare të takimit, Hatami ka qenë i prerë në mesazhin e tij: në rast se forcat armike tentojnë të shkelin tokën iraniane përmes operacioneve tokësore, objektivi i ushtrisë duhet të jetë i qartë – asnjë person nga forcat sulmuese nuk duhet të mbijetojë.
Ky urdhër vjen në një kohë tensionesh të larta rajonale, ku Irani po kërkon të shfaqë forcën dhe gatishmërinë e tij mbrojtëse. Hatami ka kërkuar nga vartësit e tij që planet për kundërshtimin e metodave të sulmit të armikut të zbatohen me saktësinë më të lartë. Ai theksoi se strategjia e Iranit bazohet në monitorimin e rreptë dhe reagimin e menjëhershëm ndaj çdo taktike që SHBA apo Izraeli mund të përdorin në terren.
Deklaratat e fundit shihen si një mesazh i drejtpërdrejtë drejtuar Uashingtonit dhe Tel Avivit, duke paralajmëruar pasoja fatale në rast të përshkallëzimit të konfliktit në operacione direkte në territorin iranian. Ushtria e Iranit duket se ka kaluar në një fazë të re të gatishmërisë luftarake, ku monitorimi teknologjik dhe operativ është kthyer në prioritetin kryesor për të parandaluar dhe asgjësuar çdo tentativë për ndërhyrje ushtarake.
