Një ngjarje e rëndë është regjistruar në një fabrikë përpunimi frutash në Kiato, Greqi, ku një grua shqiptare 40-vjeçare ka pësuar plagë serioze në kokë, duke humbur lëkurën në zonën e ballit si dhe një pjesë të skalpit.
Sipas raportimeve të mediave greke, incidenti ndodhi më 1 prill, teksa gruaja ishte duke punuar me një makineri që i kapi flokët, duke shkaktuar dëmtime të rënda fizike.
E plagosura u transportua menjëherë në spital, ku ndodhet jashtë rrezikut për jetën.
Në spital ajo u shoqërua nga dy persona, të cilët fillimisht deklaruan se e kishin gjetur në rrugë në atë gjendje. Ndërkohë, flokët dhe pjesë të lëkurës së saj ishin vendosur në një qese.
Dyshimet janë se ky version i ngjarjes mund të jetë dhënë për të fshehur faktin që gruaja ndodhej në Greqi pa dokumentacion të rregullt. Nga ana tjetër, pronari i fabrikës, një shtetas grek 42-vjeçar, u arrestua ditën e ngjarjes, por më pas është lënë i lirë.
